Pelangi Batak " Sibalik Hunik "

🎶Hape Ndang Tuk Gogoku Laho Mandapothon Ho..ho.ho...🎶

Sahalak na margareja di Borngin Natal i, holan si Binsar natinandana. Ipe ala dongan saparmeaman na  do  kulia di Manado. Dongan na martungkar pingkiran dinahurang lobi sitaonon dibagasan parngoluon. Si Binsar ma donganna marsoring soring. Molo ndung adong na hurang pintor hatop do diaduhon tu si Binsar tungpe sipata ndang adong alus ni si Binsar alai, naborat na dirirohana hatop do numeang.

Tingki i bulan dua bolas sahat ma barita tu imana naung jumolo marujung ngolu Among na. Pintor si Binsar do jumolo di adu tu jabu painsolatan, Indekost. Ditompashon pamatangna, diandungkon lungun nai dijoloni si Binsar.

“Mahua? Aha namasa? Denggan hatahon!!” ninna si Binsar hatihai. Dengan diapus ilu i huhut do disungkun.

“Nungga marujung ngolu be Amonghu?”

“Boha... Aha nimmu... Marujung ngolu tulang, Nandingan?” Tartondi si Binsar ndung diboto barita i. Nian, sian na mamungka singkola pe di Manado nungga ditariashon si Vannesa na hurang sehat Amongna.  

“Sogot mulak maho. Unang pingkiri ongkos. Eta papungu paheanmu!” ninna si Binsar. Ditiop momos tangani si Vannesa, ditait laos dihaol. Ditogihon tu jabu painsolatan ni borua i.

“Papungu majo paheanmu, asa maridi, martapian jo ahu” ninna si Binsar, parmisi ima tongkin.

Marsampur ilu si Vannesa papungu paheanna. Marabur, mardudus ilu sian simalolong na. “Among....!!! Puluk ni rohami manandinghon hami. Tolu bulan nae wisuda nama ahu Amonghu. Amonghu nalagu paet nai di ahu borumon. Hansit nai Among” sai mangandungi si Vannesa huhut dilompiti pahean nalaho siboanonna.

“Tudia ma hami borumon, Among. Songon solu natipulan hole ma hami on. Amonghu!!!” Ditompashon pamatangna huhut dihaol baju batik na binoanna sian huta, baju Batik ni Among na. Molo ndung mansihol situtu imana tu Among pintor pahean ido dibaen ulosna laho modom. Dihansing tas nalaho siboanon na on tompu muse tangis, laos disursairhon isini tas i.

“Bapakku... Bapak!!! Bapak oi...” ronggom ma sude jolma na mainsolat di jabu i naing marnida. Digurdak biluk ni si Vannesa. Disungkun aha namasa. Disungkun boasa tangis. Sai lalap holan andung do natarbege sian pamanganni si Vannesa.

Humarojor si Binsar sian alaman marlojong tu biluk ni si Vannesa. Dibereng nungga torop jolma marnida. Mansai gale idaon pamatang ni si Vannesa hundul mangunsande sai songon jolma naung mago mataniarina. Naung sondot portibi dingoluna.

“Nungga bei, nungga bei!!” huhut perek iluni si Binsar mangelek. “Toe ma sude do jolma marsitaonan naborat. Sabar ma hita” diapus si Binsar bohini si Vannesa jala huhut dipandenggan obukna naung harhar somartontu.  “Nion tingketmu. Transit di Jakarta. Ndungi tu Medan. Nion ole-ole otik. Sotung lomos roham. Borhat dohot sogot pukkul sia. Patibuma dah!!! unang be sai tangis” dipadao si Binsar parnidaanna unang nian dibereng si Vannesa ilu na maningkir disimalolongna. Ilu na ninongnong na sian nangkaning ndung dibereng gale pamatang ni si Vannesa.

Mansai momos dihaol si Vannesa pamatang ni si Binsar ditompashon di abaranai. lungun namansai dok-dok. Lungun I sosae holan diandunghon.

“Heg..heg...!!! unang be sai tangis” ninna si Binsar. Dipadenggan sude paheanni si Vannesa. Dipatutur rodi angka pahean na metmet dilompit dipamasuk tu tas I, dohot ole-ole sisaotik i dimpos dibaen tu tas.

Hundul angka jolma na mamereng. Si Binsar ma napaboahon aha namasa. Laos tumpu dongan sajabunai mangangguk. Di ingot Among na naso ada be. “sama kita kak nggak punya Ayah lagi” ninna laos marlojong dihaol si Vannesa.

Manogot ni ari nungga jumolo si Binsar paima di emper ni jabu. Naing manaruhon si Vannesa tu Bandara. Di injam si Binsar motor ni dongan sakarejona. Ima dipangke manaruhon. Marbosol simalolong ni si Vannesa. Ndang modom saborngin alani lungun ni roha. Andorang so borhat di bungka si Binsar palastik karesek na gaung di motor i.

“Sarapan jo hita” ninna si Binsar.

“Ndang male ahu..” songon nasomartondi si Vannesa mangalusi.

“Unang gabe dohot ho si pingkiran. Ingkon hipas do sahat di huta sotung manambai arsak” Ninna si Binsar. Disurdukhon sabungkus sarapan i tu jolono si Vannesa nungga jolo di bungka.

Holan sansendok ma di allang si Vannesa, sampokkuk nungga sae di imana. Rohana nungga dihuta holan pamatangna nama di Manado. “Allang otik nae..!!” ninna si Binsar.

“Nungga bosur ahu”

Naing disulangi si Binsar sarapan i laos marabur iluni si Vannesa. Sosonbopon, laos mamgandung “bapak....!!” sundat majo di sulanghon si Binsar.  Na tompu do di ingot si Vannesa hatiha dihuta molo ndang langhu mangan jalo do Among na mangasulangi. Di elek di anju asa mangan.

Sahat di Bandara denggan di Taruhon si Binsar. “Posrohangku. Ingkon hipas doho sahat di bonapasogit. Ingot mangan di dalan. Sotung mandia roham dah.. ingot gok dope jolma parholong roha  tu ho” dipaingot si Binsar andorang so cek in dope si Vannesa.

Saleleng dipardalanan ganup jom martelefon si Binsar disungkun naung mangan. Ingkon sehat. Unang tambai arsak. Manogot i di Kampus ndang tu parsiajaran i be rohani si Binsar, apala himpas holan tu si Vannesa nama rohana. “Nungga di dia nuaeng? Mangan do? Songon dia do” ima nasai marsigorgor dirohana. Mulak sian kampus ingkon karejo do si Binsar. Karejo di servis Motor dohot Mobil. Songon karejo sampingan holan palua mangan dohot uang kost. Di inganan karejo pe songon naso tabo do panghilalaan na. Holan na jongjong huhut marangan angan. Nungga piga hali dipinsang dongan sakarejona. 

“yups” holan ido alus ni si Binsar. Ndung pe hapit jari jarina di baen rante ni motor na pinadenggan na asa tarjolma.

 “Amang oi…!!!” ninna ndung dibereng sirang sisilonna sian jari jarinai. Mangontaki, maniak. Mangulon imana tongkin mambungkus tangan na i. Di telefon tu si Vannesa.

“Laho tu Medan nama” ninna si Vannesa mangalusi.

“Nungga mangan ho? Sehat doho kan?” disungkun si Binsar. Di hojot manghatai.

“Nungga, sehat do ahu. Mauliate dah”

“Olo. Ingkon mangan doho asa margogo, ateh. Toe ma. Naing karejo ahu” ninna si Binsar diharat pangkeanna manaon hansit ni tangganai. Ndang di paboa si Binsar nahapit jari-jarina.

Tonga borngin ma parsahat ni si Vannesa di hutana lumban Pinasa. Di alaman i ditompashon sude na tiniopna, marlojong imana bongot tu jabu. Dipapuas ma andung na.

“Amonghu...!!!” dihutur bangke ni Among nai. “Tangihon ahu borumon. Boru buha bajumon. Among...!!!” mangangguk bobar si Vannesa di ummai hurum ni Among naung marsalaon i.

“Bapa.. laho wisuda nama ahu. Puluk roham ndang marnida ahu wisuda??? Ai tung dungo jo bapakku. Heikh....heikh.. bapakku” marsilonging andung nai. Ditailihon dompak Inong na naung martali tali. “Puluk roham bapak, manandingkon inong on. Bapakku naburju, nabasa” somarna loja si Vannesa mangandung. “Ise be mangasulangi ahu bapa laho mangan molo mardandi” diandungkon muse.

“Nungga sae bei....” ninna namboruna hape laos dohot mandongani mangandung.

“Bere....! Nungga bei.” Ninna tulang ni si Vannesa. Diadu berenai. Dipapos rohana.

Manghuling pe handphone ni si Vannesa ndang dihilala imana be. Andungna do dipagogo.

“Handphone, handphone manghuling, handphone nise doi??” adong sada Ina manggorahon.

“Nungga bei, Inang, nungga sonang be Among mi” ninna Inong ni si Vannesa laos di haol borunai.

“Nungga bei ,kak” ninna anggina. “Nungga sonang be Among ta i” huhut tumatangis.

“Lokma di papuas” ninna nadeba.

“Rohanama disi. Tontu mansai lungun do rohana. Dokma dipapuas” ninna nasada nari.

“Pariban, nungga bei. Sotung laos dia-dia ho annon” ninna paribanna sian tubu ni namboruna siangkangan.

“Amonghu...” pingsan si Vannesa. Humalaput majo sude.

“Jou jo mantari” marsorak sahalak ama ama

“loas. Asa maralogo jo. Pahinsat be jo. Tusan jo sude!!” ninna Tulang na.

Ima parsaeni andung i. Diboan ma si Vannesa tu hombar jabu disima dipispis, didampol asa tumibu tarsunggul. Nungga ditontohan be ari partuat  na.  ulaon sarimatua madibaen. Soadong dope namarhasohotan ianakkon na. Ido somalna jala ido uhum dohot adat na.

Episode 2

“Ende ni on” tompu si Binsar manghatai. Tarsunggul ma si Vannesa sian angan-angan na. Huhut Dilap iluna.

“Tongkin doho…!!!” ninna si Vannesa.

“Tongkin ma dah. Nungga jolo hu pesan nangkaning” ninna si Binsar ditiop tiop dope mie goreng na tinuhorna.

🎶Oh, amang, oh inang, masihol au masihol ahu tuho, naing idaon hu tibu naing haolonhu ho gomos laos sinok diabingan mi 🎶 ditorushon si Vannesa dope endei tunggpe maraburan iluna. Ndang di pardigilhon be si Binsar.

“Matauk hu paboa ma endei tu ho, loas holan i endem nasaminggu on” ninna si Binsar. Sopala martangiang nungga di allang mie goreng i. Haro sipatu na so dibungka dope tahe. Holan pellet dope imana di karosi i pintor mie goreng ido dialtuphon.

“Buat jo tes an” ninna si Binsar manuru. Naing niang lingkak gitar i sian abingan ni si Vannesa dohot endei unang be di torushon. Ai ende i do pasunggulhon botni rohana.

Hehe si Vannesa mambuat tes tu dapur, pintor digotaphon si Binsar tali tolu ni gitar i.

“Nah.. .!!! dohot tes pe ndang boi buaton mu” ninna si Vannesa.

“Bah!! So jabukku on. Dia ma huboto di dia inganan ni tes” ninna si Binsar.

“Ima kan, digotaphon ho muse tali tolu. Ikh!!! Ai na jungkat maho” ninna si Vannesa.

“Nagotap sandiri doi. Ndang lomo rohana be di piltiki”

“Na godang hatam” ninna si Vannesa.

Pasma sataon ndang marAma be si Vannesa. jala ndang boi mulak mondulo Inong na di lumban pinasa. Hinorhon ni cuti naso adong. Ndang boi tumibu mulak mambabo udean ni Among na. Pais parik ni tinambor.  Sian telefon ma imana mandok selamat Natal tu Inong na dohot anggina. Lungun situtu do rohana ndang boi mulak.

“Taon naro boi dope mulak” holan hatani si Binsar ima sai marhusori di rohana. Marpanghirimon tu taon naroma imana.

Marudut (Bersambung)

Penulis : Erikson Simarmata